O proxecto estrutúrase en varias liñas de actuación complementarias que combinan educación ambiental, promoción da saúde mental, sensibilización sobre a economía azul e posta en valor do patrimonio mariño-costeiro.

• A actividade "Brigada Azul" desenvolverase entre xullo de 2026 e decembro de 2027 e estará centrada na educación ambiental e na acción directa sobre o territorio. A través de sesións formativas abordaranse cuestións como a contaminación mariña, os plásticos e microplásticos, os derrames de hidrocarburos, o cambio climático e a protección dos ecosistemas costeiros. Estas accións complementaranse con xornadas de limpeza de praias e recollida selectiva de residuos, fomentando a participación activa das persoas participantes na conservación do litoral.
• Baixo a denominación "Enredando no Mar" desenvolveranse distintas accións divulgativas relacionadas coa biodiversidade mariña e a pesca sostible. Incluiranse dúas charlas anuais, orientadas a dar a coñecer os ecosistemas mariños, os impactos ambientais e a importancia da súa conservación. Así mesmo, realizarase o obradoiro "Rede Azul", impartido polo patrón maior da Confraría de Pescadores de Burela, no que se abordarán aspectos relacionados coas artes de pesca artesanal, os diferentes tipos de redes, a economía circular aplicada á reciclaxe e reutilización destes materiais e os principios da pesca sostible.
• A través da actividade "Sendeiros Azuis" levaranse a cabo percorridos interpretativos por diferentes Sendeiros Azuis do territorio GALP A Mariña–Ortegal, como a Ruta do Litoral Burelés, Cubelas–O Rego, O Torno, Río de Lavar–Muíño do Medio, a Ruta das Praias de Foz e a Ruta do Faro de Illa Pancha. Estas saídas permitirán poñer en valor o patrimonio natural e paisaxístico do litoral, fomentar a sensibilización ambiental e climática, identificar os efectos do cambio climático na costa e promover hábitos de vida saudables a través do contacto coa natureza.
• O obradoiro "Eco-Arte Mariña" consistirá na creación de pezas artísticas empregando materiais naturais e residuos recollidos no litoral. A actividade pretende sensibilizar sobre a contaminación mariña e a fraxilidade dos ecosistemas costeiros, ao tempo que favorece a creatividade, a expresión artística e o benestar emocional das persoas participantes.
• A actividade "Mareas Cognitivas" utilizará o mar como elemento simbólico e motivador para traballar a estimulación cognitiva mediante a elaboración e utilización de materiais específicos. As sesións estarán orientadas ao desenvolvemento das funcións cognitivas, ao fomento da creatividade e da autonomía persoal, á evocación de recordos e experiencias vinculadas ao mar e á promoción da sensibilización ambiental.
• No marco da actuación "Un Mar de Imaxes" elaborarase un vídeo documental que recollerá o desenvolvemento do proxecto e os seus principais resultados, así como pequenas pezas audiovisuais destinadas á difusión das actividades a través das redes sociais, favorecendo a divulgación do proxecto e a sensibilización da cidadanía.
• Finalmente, celebrarase a actividade "O Mar na Mente", un acto público de peche no que se presentarán os resultados acadados, se proxectará o vídeo final do proxecto e se expoñerán as obras realizadas no obradoiro Eco-Arte Mariña, acompañado dunha degustación de petiscos elaborados con produtos do mar como elemento de posta en valor da cultura mariñeira e da gastronomía local.