ACTIVIDADE 1. Diagnose sobre a evolución da pesca e o marisqueo na Mariña Ortegal: análise comparada no territorio.
Comprenderá unha análise de información de carácter primario e secundario, a través de: 1.Estudo de datos secundarios procedentes de diferentes fontes públicas. 2. Realización de grupos de traballo de análise e proposta (GAP). A análise realizaríase na zona costeira da Mariña e Ortegal, co obxectivo de que non revirta unha reflexión de carácter localista, senón unha visión máis ampla e integradora do sector. Esta actividade servirá para analizar a problemática da perda de capacidade produtiva e comercializadora de determinadas confrarías/lonxas da zona, entre elas a de Cariño, problemáticas sociais ligadas ao sector ou outros factores.
As temáticas que se abordarán centraranse sobre todo en analizar as causas que impactan no mantemento e a produtividade dos recursos pesqueiros, a súa preservación e biodiversidade e como afecta isto á actividade pesqueira. Ver tamén o impacto na cadea vertical da pesca, ou o que implica na actividade das redeiras. Os resultados destes traballos sistematizaranse a través da elaboración dun Informe de Síntese.
ACTIVIDADE 2. Programa de divulgación do oficio tradicional das redeiras
Este programa ten como obxectivo dar a coñecer a profesión das redeiras entre o alumnado de centros educativos de Cariño, ao obxecto de ver cal é o impacto que xera esta actividade a nivel local e espertar o potencial interese laboral por esa ocupación. É un programa orientado a espertar interese na comunidade por esta actividade de carácter artesanal, que se desenvolve no porto de Cariño. Comprenderá os traballos de: 1.Preparación das aulas, contidos, recursos e relato. 2. Desenvolvemento de dúas xornadas de divulgación dirixidas preferentemente ao alumnado de 4º ou 5º de secundaria ou bacharelato. 3. Visita á nave de redeiras para coñecer a profesión e o ambiente de traballo.
ACTIVIDADE 3. Xornada final das “Mulleres do mar de Cariño”.
Esta xornada xuntará ao colectivo de mariscadoras, redeiras e traballadoras da conserva da vila, co obxectivo de poñer en valor o legado destas profesións e o que supoñen no entramado pesqueiro da vila. As mulleres do mar de Cariño transmitirán á veciñanza o pasado, presente e futuro do sector pesqueiro no territorio, poñendo en valor a figura das mulleres como garantes da sustentabilidade dos recursos pesqueiros e do desenvolvemento local. A xornada estruturaríase en tres espazos:
1. Espazo de presentación de resultados da diagnose sobre a evolución da pesca e o marisqueo na zona da Mariña e Ortegal.
2. Parladoiro das vidas mariñeiras. Procuraríase un panel de persoas profesionais do sector que abordarían cuestións relacionadas co desenvolvemento laboral das súas ocupacións.
3. Espazo de degustación de produto pesqueiro. Por último, realizaríase unha degustación de produto do mar, con produto procedente de lonxas locais
ACTIVIDADE 4. Plan de comunicación
Consistirá no deseño dunha identidade do proxecto e tamén da produción de novas para medios e redes, optimizando os recursos existentes e non creando web, nin redes con custo.
ACTIVIDADE 5. Plan de dinamización
Comprende a estratexia de coordinación técnica do proxecto e de dinamización de espazos e eventos para favorecer a participación de públicos, en todas as actividades do proxecto. Documentar información proxecto.
