Sorry, you need to enable JavaScript to visit this website.

“Sempre que se valore o produto do mar é beneficioso para Benboa, xa que o mar é a esencia da nosa marca”

Carlos Brión, socio cofundador de Benboa

Carlos Brión, socio cofundador de Benboa.

 

Como afrontades a situación actual? Hai novidades cos cambios de fase ou aínda estades pendentes de abrir?

Debido á situación provocada pola pandemia da Covid-19, fixemos un ERTE e, ata agora, non abrimos porque non compensaba. No restaurante de Corrubedo, con cinco mesas na terraza, non era viable abrir. Ademais, en Corrubedo, onde a xente se concentra durante a fin de semana, se non podemos estar a tope, a apertura é imposible. Nós pensamos abrir sobre o día 12 de xuño, pero valoraremos en función das novidades. Hai bastante incertidume, o que impide facer planificacións, pero traballamos con ese horizonte e veremos a evolución da fase 2 durante esta semana.

Si, porque igual hai fases que se aceleran.

Claro, se os contaxios seguen a gran redución que están experimentando os últimos días é posible que poidamos falar dunha fase 3 máis próxima e, por tanto, abrir antes. Pero, de momento, en Corrubedo non hai clientela suficiente e tampouco vén xente de fóra. Ata que non haxa mobilidade entre provincias vemos complicado que a cousa se anime máis.

Hai unha porcentaxe mínima de aforo a partir da que compense abrir, non?

Podemos abrir coa situación actual e aguantar un mes, pero o que non é viable é estar co 50% do aforo durante moito tempo, porque iso é o mesmo que dicir que o ano pasado, cando estabamos co 100% dispoñible, eramos millonarios. E non é así. Os números están feitos para esa ocupación do 100%. Que é algo temporal? Non pasa nada. Pero xa non é só ese o problema, senón que non hai a mesma mobilidade que antes. Igual no restaurante de Santiago podemos facelo, pero en Corrubedo non.

O restaurante de Santiago irá a un ritmo distinto?

Santiago está igual. Toda a comida que se vende nos restaurantes Benboa a facemos desde a cociña cenral que temos en Corrubedo, situada xunto á nosa cetárea. Por tanto, abrir Santiago supón abrir Corrubedo. Esta semana será clave. De feito, estes días teremos unha reunión en Corrubedo para analizar a información máis actual e intentar poñer unha data como obxectivo de apertura.

Cantas persoas forman parte do equipo de Benboa, en todos os establecementos?

En total somos, fóra do verán, unhas 32 ou 33 persoas e, no verán, superamos as 40. Por tanto, abrir require dunha estrutura e organización rigorosa.

Ademais elaborades o voso produto e iso tamén esixe un traballo adicional.

Por suposto. Temos que poñernos a facer todos os produtos utilizando a materia prima da cetárea e da lonxa de Ribeira. Arrancar con todo supón comezar, como mínimo, unha semana antes na cociña central de Corrubedo para que os restaurantes, cando abran, teñan a mercancía elaborada.

Co confinamento confirmouse a grande importancia do sector primario e do mar, co que traballades a diario. Desde a vosa perspectiva, por que é tan importante a súa actividade para a nosa economía?

Nós considerámonos como restaurantes de mar, tanto nos locales que xa temos abertos en Corrubedo e Santiago como a apertura pendente na Coruña. Estamos cun proxecto de I+D destinado a elaborar hamburguesas de mar e, en Galicia, se por algo somos coñecidos fóra é polo mar. Para nós utilizar a materia prima do noso mar, elaborala e vendela nos restaurantes Benboa é a esencia da nosa marca e imaxe. É fundamental que a xente perciba isto, que creo que, en certa medida, xa se produciu durante o confinamento, pois moita xente aproveitou para mercar produto fresco do mar e cociñalo con maior dedicación. Para nós iso é positivo porque hai unha maior concienciación. Sempre que se valore máis todo o produto procedente do mar vai no noso beneficio.