Co fin de acadar os obxectivos establecidos, o proxecto contempla o desenvolvemento das seguintes actuacións:

Actividade 1. Rehabilitación e acondicionamento do inmoble

A actuación principal consiste na rehabilitación e acondicionamento dun edificio de tres plantas situado na vila de Cedeira para a creación dun establecemento turístico integrado por tres apartamentos turísticos de unha chave e unha marisquería denominada "A Cetaria".

A intervención permitirá recuperar un inmoble representativo da arquitectura tradicional dunha vila mariñeira, adaptándoo ás necesidades actuais de accesibilidade, confort e eficiencia, ao tempo que se crea unha infraestrutura destinada a impulsar un modelo de turismo sostible estreitamente vinculado ao mar e aos produtos pesqueiros locais.

Actividade 2. Desenvolvemento de experiencias de turismo mariñeiro

Como complemento á oferta de aloxamento e restauración, deseñarase unha programación de experiencias turísticas vinculadas ao patrimonio marítimo, aos produtos do mar e á cultura mariñeira, dirixidas ás persoas hóspedes do establecemento.

Estas experiencias materializaranse nos seguintes paquetes:

Pack "Aloxamento – Descubrindo o Mar"

Inclúe o aloxamento, unha degustación de produtos do mar na marisquería e unha ruta guiada pola vila de Cedeira centrada na interpretación do patrimonio marítimo e mariñeiro. As visitas permitirán coñecer a historia da pesca local, as profesións do mar, as embarcacións tradicionais, a biodiversidade mariña e os recursos naturais do litoral. Así mesmo, prevese a realización de visitas á Confraría de Pescadores de Cedeira para achegar ás persoas visitantes ao funcionamento da actividade pesqueira e da comercialización do peixe e do marisco.

Pack "Aloxamento – Saboreando o Mar"

Esta modalidade combina o aloxamento cunha degustación gastronómica baseada en peixe e marisco de tempada na marisquería "A Cetaria". Os menús elaboraranse con produtos propios comercializados por A TRAIÑA PEIXES E MARISCOS S.L. e con materias primas de proximidade, promovendo o consumo de produtos frescos, a gastronomía tradicional galega e a valorización das especies capturadas pola frota local.

Pack "Só Aloxamento – Descubrindo a Vila"

Dirixido ás persoas visitantes que desexen coñecer libremente Cedeira e a súa contorna, ofrecendo un aloxamento de calidade integrado nunha vila mariñeira e complementando a oferta turística existente.

En conxunto, estas actuacións configuran unha proposta innovadora de turismo experiencial que combina aloxamento, gastronomía e divulgación do patrimonio mariñeiro, contribuíndo á promoción dos produtos do mar e á diversificación da actividade dunha empresa pertencente ao sector pesqueiro.