Actividade 1. Reorganización e adecuación do establecemento turístico.
Levarase a cabo a reorganización e modernización dos espazos interiores e comúns do establecemento para crear un aloxamento costeiro sostible, funcional e adaptado ás novas demandas do turismo responsable. A actuación incluirá a creación de 13 habitacións distribuídas en catro plantas, con espazos comúns compartidos, mellorando a funcionalidade, a accesibilidade, a seguridade e a convivencia das persoas usuarias.
Actividade 2. Desenvolvemento dunha oferta turística vinculada á economía azul.
Deseñarase un novo posicionamento do establecemento orientado ao turismo costeiro sostible, integrando experiencias relacionadas coa cultura mariñeira, a gastronomía local, a natureza e as actividades deportivas. Promoveranse paquetes turísticos que inclúan visitas ás lonxas, aos portos e a outros recursos do territorio, favorecendo a desestacionalización da demanda e a posta en valor da identidade mariñeira.
Actividade 3. Accións de divulgación e valorización do patrimonio marítimo-pesqueiro.
Desenvolveranse actuacións de sensibilización para dar a coñecer a importancia do sector pesqueiro, dos oficios tradicionais e da cultura mariñeira. Instalaranse paneis informativos con contidos divulgativos e códigos QR que permitirán acceder a testemuños de profesionais do mar, destacando especialmente o papel das redeiras e doutras mulleres vinculadas ao sector pesqueiro.
Actividade 4. Creación dun espazo para a promoción e comercialización de produtos locais.
Habilitarase un punto de exposición e venda de produtos procedentes do mar e doutros produtos de proximidade, en colaboración con empresas, confrarías, conserveiras, redeiras e entidades sociais do territorio, contribuíndo á promoción dos produtos pesqueiros locais e ao fortalecemento das cadeas curtas de comercialización.
Actividade 5. Implantación de medidas de sustentabilidade e sensibilización ambiental.
Executaranse accións orientadas á promoción dun turismo responsable, mediante a instalación de paneis informativos sobre conservación do medio mariño, puntos de reciclaxe e iniciativas de recollida de residuos no litoral. Así mesmo, fomentarase a participación das persoas visitantes en accións de sensibilización ambiental e na difusión dos principios da economía circular.
Actividade 6. Desenvolvemento dun produto turístico diferenciado vinculado ao sector pesqueiro.
Crearase unha oferta turística especializada baseada na colaboración co sector pesqueiro e na posta en valor dos seus produtos, integrando experiencias gastronómicas, culturais e interpretativas que reforcen a identidade marítimo-pesqueira do territorio e diversifiquen a oferta turística local.
Actividade 7. Consolidación dun novo modelo de negocio sostible.
O proxecto permitirá transformar o actual modelo de aloxamento nun establecemento turístico de maior valor engadido, orientado á economía azul e ao turismo sostible, favorecendo a creación de emprego, a dinamización da economía local e a viabilidade económica da actividade ao longo de todo o ano.
