O vindeiro luns, 21 de setembro de 2026, ás 12:30 horas, a Casa da Cultura do Concello de Valdoviño acollerá a presentación do proxecto “MARIS: Memoria, Arte, Rede de Inclusión Social”, unha iniciativa promovida pola Asociación Sociocultural ASCM que combina patrimonio marítimo-pesqueiro, memoria, cultura e inclusión social.

O proxecto nace co obxectivo de recuperar, preservar e difundir a memoria e o patrimonio cultural marítimo-pesqueiro, ao tempo que promove a participación das persoas con discapacidade como axentes activos na conservación, transmisión e difusión da cultura mariñeira.

A través de diferentes accións, MARIS pretende achegar ás persoas participantes aos saberes, oficios, tradicións e formas de vida historicamente vinculadas ao mar e á actividade pesqueira, contribuíndo á súa posta en valor e á súa transmisión ás novas xeracións.

Entre as actuacións previstas destaca a formación en patrimonio marítimo-pesqueiro, que permitirá afondar no coñecemento da cultura e da identidade mariñeiras. O proxecto contempla tamén un importante traballo de recuperación da memoria oral, recollendo experiencias, coñecementos e testemuños relacionados coa vida e cos oficios do mar.

Outro dos eixos da iniciativa será a creación dunha obra teatral inclusiva, concibida como unha ferramenta para divulgar este patrimonio desde unha perspectiva participativa e accesible. Deste xeito, a cultura convértese tamén nun instrumento para favorecer a inclusión social e dar visibilidade ás capacidades e achegas das persoas participantes.

A presentación do proxecto terá lugar o 21 de setembro, ás 12:30 horas, na Casa da Cultura de Valdoviño, e permitirá dar a coñecer os seus principais obxectivos, actuacións e alcance.

Desde o GALP A Mariña-Ortegal continúase contribuíndo á dinamización do territorio mediante iniciativas que favorecen a conservación do patrimonio marítimo-pesqueiro, a recuperación da memoria colectiva e a participación social, reforzando o vínculo entre as persoas, o mar e a identidade dos territorios costeiros.

O proxecto “MARIS: Memoria, Arte, Rede de Inclusión Social”, promovido pola Asociación Sociocultural ASCM, foi tramitado a través do GALP A Mariña-Ortegal no marco da convocatoria 2026 e conta cunha axuda cofinanciada pola Unión Europea, a través do Fondo Europeo Marítimo, de Pesca e de Acuicultura (FEMPA), e pola Xunta de Galicia – Consellería do Mar.

Preservar a memoria do mar significa tamén conservar os saberes, as tradicións e a identidade dun territorio estreitamente ligado á súa cultura mariñeira.